चेंबूर येथील भुलिंगेश्वर देवालय ट्रस्टच्या प्रांगणात श्रावणानिमित्त सव्वा लाख रुद्राक्षांपासून साकारण्यात आलेल्या भव्य ११ फुटी रुद्राक्ष शिवलिंगाची प्रतिष्ठापना करण्यात आली आहे. या शिवलिंगाच्या पूजेला नगरसेविका व प्रभाग समिती अध्यक्षा आशा मराठे यांनी भेट देत भगवान शिवांचे दर्शन घेतले.
१३ ऑगस्टपासून सुरू झालेल्या या धार्मिक सोहळ्यात ११ सप्टेंबरपर्यंत विविध धार्मिक कार्यक्रमांचे आयोजन करण्यात आले आहे. आशा मराठे यांनी विधिवत पूजेत सहभागी होत उपस्थित शिवभक्तांशी संवाद साधला आणि सर्वांना श्रावण महिन्याच्या शुभेच्छा दिल्या.
अध्यात्म उपासिका मोहिनी गुप्ता यांच्या पुढाकाराने आयोजित या सोहळ्यात ‘राईज ऑफ आदि महाशक्ती’ या अध्यात्मिक यूट्यूब चॅनेलचे उद्घाटन करण्यात आले. तसेच ‘दक्षिणमुखी महाकाल रहस्य जो कोई नहीं जानता’ या पॉडकास्टचेही उद्घाटन करण्यात आले.
यावेळी ‘राष्ट्रमित्र’चा २१ वा वर्धापनदिन साजरा करण्यात आला असून, ‘राष्ट्रमित्र’ने २२व्या वर्षात पदार्पण केले. यानिमित्त विशेषांकाचे प्रकाशन करण्यात आले.
या प्रसंगी आशा मराठे यांनी मोहिनी गुप्ता यांना त्यांच्या पुढील वाटचालीसाठी शुभेच्छा दिल्या. दरम्यान, भव्य ११ फुटी रुद्राक्ष शिवलिंगाच्या दर्शनासाठी परिसरातील शिवभक्तांची मोठी गर्दी होत असून, भाविकांमध्ये या धार्मिक सोहळ्याबद्दल उत्साहाचे वातावरण पाहायला मिळत आहे.
