अंधेरी परिसरातील चित्रकूट मैदानस्थित डीआरएम मोटर्स, डीआरएम अपारेल्स आणि चित्रकूट बँक्वेट हॉल यांच्या सुमारे ३४ हजार चौरस फूट क्षेत्रफळावरील अनधिकृत बांधकामाचे बृहन्मुंबई महानगरपालिकेच्या ‘के पश्चिम’ विभागाकडून निष्कासन करण्यात आले.
उपायुक्त (परिमंडळ-४) भाग्यश्री कापसे यांच्या मार्गदर्शनात, सहायक आयुक्त (के पश्चिम विभाग) चक्रपाणी अल्ले यांच्या नेतृत्वात ही कारवाई करण्यात आली.
अनधिकृत बांधकाम प्रकरणी बृहन्मुंबई महानगरपालिकेच्या वतीने चित्रकूट मैदानस्थित डीआरएम मोटर्स, डीआरएम अपारेल्स आणि चित्रकूट बँक्वेट हॉल यांच्याशी संबंधित शाह कन्स्ट्रक्शन कंपनीला नोटीस बजावण्यात आली होती. तथापि, त्यांनी या नोटीसीला माननीय उच्च न्यायालयात आव्हान दिले होते. माननीय उच्च न्यायालयाने सदर याचिका फेटाळली. या अनुषंगाने बृहन्मुंबई महानगरपालिकेच्या ‘के पश्चिम’ विभागाने निष्कासनाची कारवाई हाती घेतली. या अंतर्गत, डीआरएम मोटर्स, डीआरएम अपारेल्स आणि चित्रकूट बँक्वेट हॉल यांच्या सुमारे ३४ हजार चौरस फूट क्षेत्रफळावरील अनधिकृत बांधकामाचे आज निष्कासन करण्यात आले.
‘के पश्चिम’ प्रशासकीय विभाग अंतर्गत कार्यरत इमारत व कारखाना विभागातील अधिकारी आणि कर्मचारी यांनी विविध संयंत्रांच्या सहाय्याने ही कारवाई केली. आंबोली पोलीस ठाण्याकडून यावेळी पुरेसा बंदोबस्त तैनात होता.
