पत्रकार सतत २४ तास लोकांपर्यंत बातम्या पोहोचवण्यासाठी झटत असतात. त्यांच्या व्यस्त जीवनात थोडासा विरंगुळा आणि मनोरंजन मिळावा, या उद्देशाने दरवर्षीप्रमाणे या ही वर्षी ग्लोबल मीडिया फाऊंडेशन यांच्या वतीने चेंबूर येथील जवाहर विद्या भवन मैदानावर “मीडिया क्रिकेट चॅम्पियनशिप”चे आयोजन करण्यात आले.
या स्पर्धेला प्रमुख पाहुण्या म्हणून उपस्थित असलेल्या महापौर रितु तावडे यांनी आपल्या क्रिकेटप्रेमाची झलक सर्वांना दाखवली. त्यांनी आमदार सना मलिक शेख यांच्या सोबत स्वतः टर्फ पीचवर उतरून फलंदाजी आणि गोलंदाजी करत खेळाचा आनंद घेतला. यावेळी उपस्थितांमध्ये मोठा उत्साह पाहायला मिळाला.
स्पर्धेच्या अंतिम सामन्यात ‘लोकशाही’ आणि ‘टीव्हीजेए’ या संघांमध्ये तुफानी लढत झाली. या सामन्यात टीव्हीजेए संघाने उत्कृष्ट कामगिरी करत विजेतेपद पटकावले.
या टूर्नामेंटचे उद्घाटन शिवसेना (उद्धव बाळासाहेब ठाकरे) उपनेते सुबोध आचार्य आणि नगरसेविका अंजली नाईक यांच्या हस्ते करण्यात आले. तसेच, शिवसेना सरचिटणीस राहुल शेवाळे हे विशेष पाहुणे म्हणून उपस्थित होते. याशिवाय प्रभाग समिती अध्यक्षा आशा मराठे, माजी नगरसेवक किशन मिस्त्री, ग्लोबल इंडियन फाऊंडेशनचे अध्यक्ष किशोर मन्याल यांच्यासह अनेक मान्यवरांनी कार्यक्रमाला हजेरी लावली.
ही क्रिकेट स्पर्धा पत्रकारांसाठी एक वेगळा अनुभव ठरली असून, कामाच्या धावपळीतून थोडा वेळ काढून खेळाचा आनंद लुटण्याची संधी या निमित्ताने सर्वांना मिळाली.
