मुलुंड पूर्व येथील नवघर मैदान परिसरात एकवीरा देवीच्या पालखी सोहळ्याला यंदा मोठा प्रतिसाद मिळाला. भक्तिमय वातावरण, ढोल-ताशांचा गजर आणि “एकवीरा आई”च्या जयघोषात संपूर्ण परिसर दुमदुमून गेला होता. हजारो भाविकांनी या पालखी सोहळ्यात सहभागी होत देवीचे दर्शन घेतले.
मुलुंड पूर्व येथील एकवीरा देवी भक्त मंडळाच्या वतीने या भव्य पालखी सोहळ्याचे आयोजन करण्यात आले होते. शुक्रवारी सकाळी साडे नऊ वाजता गव्हाणपाडा येथून पालखी मिरवणुकीला वाजत-गाजत सुरुवात झाली. पारंपरिक वेशभूषेत सजलेले भक्त, फुलांनी सजवलेली पालखी आणि भजन-कीर्तनाच्या सुरांनी वातावरण पूर्णतः भक्तिरसात न्हाऊन निघाले होते.
ही पालखी गव्हाणपाडा, नानी पाडा, म्हात्रे नगर, साळवी वाडी, आझाद नगर, खंडोबा मंदिर परिसर, नवघर पाडा अशा विविध भागांतून मार्गक्रमण करत रात्री उशिरा संभाजी मैदान येथील तुंगतेश्वर मंदिराजवळ विसावली. प्रत्येक ठिकाणी स्थानिक नागरिकांनी पालखीचे उत्साहाने स्वागत करत आरती व पुष्पवृष्टी केली.
या सोहळ्यादरम्यान प्रभाग क्रमांक ११४ च्या नगरसेविका राजोल पाटील यांनीही उपस्थित राहून एकवीरा देवीच्या पालखीचे दर्शन घेतले. त्यांनी भाविकांशी संवाद साधत सर्वांना शुभेच्छा दिल्या आणि अशा धार्मिक परंपरा समाजात एकोपा निर्माण करतात, असे मत व्यक्त केले.
दरम्यान, आज संध्याकाळी ही पालखी कार्ला लेणी परिसराकडे प्रस्थान करणार असल्याची माहिती एकवीरा देवी भक्त मंडळाचे अध्यक्ष कैलाश पाटील यांनी दिली. कार्ला येथे देवीच्या दर्शनासाठी भाविक मोठ्या संख्येने उपस्थित राहणार आहेत.
एकूणच, मुलुंडमध्ये साजरा झालेला एकवीरा देवीचा पालखी सोहळा श्रद्धा, भक्ती आणि परंपरेचा सुंदर संगम ठरला असून, संपूर्ण परिसर काही काळासाठी भक्तिमय वातावरणात न्हाऊन निघाला होता.
